Chris Martenson har samla ein foredragsrekkje han har utvikla gjennom dei siste 6-7 åra til eit «lynkurs» på 20 kapittel, der han oppsummerer menneska sine vilkår i starten på det 21. hundreåret. (Lynkurset er til saman 3 timar og 23 min. Kapittel 20 er ei oppsummering, og er ikkje med på DVD'en )
De som vitjar energikrise.no vil vere kjende med dei fleste av problemstillingane: Eksponentiell vekst, gjeldstynga økonomi, miljøproblem og ei komande energikrise. Her er dette samla til ein «pakke» som knyter trådane og konkluderer med at vi no er komne til eit knekkpunkt i menneska si historie: Dei neste 20 åra vil bli heilt ulike dei 20 føregåande.

Foredraga ligg ute på nettet, og kan sjåast kapittel for kapittel på Chris Martensons eiga heimeside her. ( http://www.chrismartenson.com/crashcourse )

Kapittel 3 om eksponentiell vekst er ein god plass plass å starte dersom du vil sjekke kva han har å by på. Kapittela som omhandlar pengar og gjeld inneheld også mykje tankevekkande stoff nett i desse dagar.

Serien er no også tilgjengeleg som DVD. Denne kan ein skaffe seg på to måtar:

1) Chris Martensson har sjølv lagt ut serien til gratis nedlasting.

Ved å nytte bittorrent -programvare kan ein laste ned fila.

Du finn PAL-versjonen ( europeisk tv-standard ) her: http://www.mininova.org/tor/2062081

Dersom dette er ukjent mark har vi ei forklaring på korleis dette kan gjerast lenger nede på denne sida.

2) Dersom bittorrent høyrest for komplisert ut, kan du få DVDen frå oss til kr. 70,- inkludert frakt.
Denne DVD'en er ikkje teksta på norsk, tempoet er for stort og stoffet for omfattande til at vanleg teksting høver.

Korleis laste ned Chris Martensons Crash Course via Bittorrent  

Bittorrent baserer seg på at filene som skal lastast ned ligg på eit større eller mindre tal datamaskiner rundt om, og ikkje på ein eller nokre få serverar. Brokkar av fila vil bli henta frå ulike maskiner, og sett saman til den opphavlege fila av bittorrentprogramvaren. Om ei av kildemaskinene blir slått av undervegs spelar ikkje noka rolle. Nedlasting av store filer med bittorrent vil kunne gå mykje raskare enn dersom dei skal hentast frå ein sentral server. Når du har lasta ned fila til di maskin, kan du hjelpe andre ved å la bittorrentprogrammet ditt stå og gå, og la det dele ut di fil.

Programvare

Dersom du ikkje har programvare for bittorrent på maskina di må du skaffe deg slik. For Windows er Bitcomet eit gratis alternativ: www.bitcomet.com

Opensource-programmet Deluge er eit anna alternativ: http://deluge-torrent.org . Dette fungerer under Linux også.

Starte nedlasting av «Crash Course»:  

Lim inn og gå til denne adressa i nettlesaren din:

http://www.mininova.org/tor/2062081

Klikk på «Download», og når du blir spurt om kva program som skal nyttast vel du den klienten du har installert. Nedlasting via bittorent vil no starte. Fila er på 3,1 GB, så du må rekne med at dette kan ta oppimot eit døger på vanleg breibandstilknyting. (Du må med andre ord IKKJE prøve deg på bittorent over ei oppringt linje! ) Den fila du får når bittorrent er ferdig med nedlastinga er ei ISO-fil. Alle vanlege brenneprogram vil kunne lage ein spelbar DVD frå denne fila.