The Essential Exponential

Arithmetic, Population and Energy.

Eit foredrag om konsekvensane av eksponentiell vekst.
Ved Professor Emeritus i fysikk ved universitetet i Boulder, Colorado,  

Albert A. Bartlett

1 time og 14 min, fordelt på to avsnitt.

Ein aldrande fysikkprofessor, eit kateter og nokre plansjar. Ingen fakter eller effektar, ingen eksplosjonar, ingen fysiske fenomen på grensa til det paranormale.

Ikkje det du ser for deg som underhaldning kanskje.

Men gløym alle forestillingane du har frå fysikktimane du har lidd deg gjennom. Dette er ein pedagogisk "tour de force", ein pedagogisk kraftprestasjon som vi vil tru dei færraste har opplevd nokon gong.

Bartlett viser med ei mengde konkrete eksempel dei lause påstandane, ønskjetenkinga og den direkte svindelen som kjenneteiknar utsegnene til tilhengarane av økonomisk vekst, og all annan vekst som er ein nødvendig konsekvens av denne.

Gjennom bruk av enkel aritmetikk viser han kor meiningslaus påstanden om "berekraftig vekst" er. Vekst er, pr. definisjon ikkje berekraftig.   På eit eller anna punkt vil veksten stoppe. Når dette skjer, fordi vi har passert ei rad fysiske grenser, vil også valfridomen vår vere borte.

Bartlett opnar forelesinga med eit postulat: "The Greatest Shortcoming of the Human Race is our Inability to Understand the Exponential Function."   Gjennom forelesinga søker Bartlett å vise at dette er sant. Men sjølv om dette er grunntemaet, kjem han inn på så mange av problemstillingane menneska er i ferd med å bli stilte overfor i den næraste framtida, at berre det er ei lita skattekiste. Kor lenge vil vi for eksempel kunne skaffe oss energi frå dei uendeleg store kolreservane. 600 år? Bartlett gir den rystande aritmetiske sanninga.

Bartlett poengterer at det han kjem med ikkje er synspunkt, men fakta baserte på enkle etterprøvbare reknestykke.

Vi skal ikkje kome med fleire eksempel, la heller Bartlett ta deg med på denne turen!

Dersom du er pedagog sjølv bør du i alle fall koste på deg å sjå denne filmen. Korleis er det mogleg å snakke om eksponentiell vekst i ein time uten at publikum rekk å koste på seg eit einaste gjesp?

Svaret er like enkelt som det er vanskeleg: Bartlett får deg til å forstå at dette angår deg, dette er heilt grunnleggande for å forstå framtida vår. Og sjølv om ingen kan spå om framtida, er det likevel mogleg å rekne seg til konsekvensane av mange av dei valga vi gjer i dag. Desse konsekvensane vil kome til å danne rammevilkåra for korleis livet blir i framtida.

Ved å knyte aritmetikken til eksempel frå den verkelege verda, løftar han aritmetikken frå (tilsynelatande) meiningslause abstraksjonar til noko som verkeleg angår oss.

Filmen er teksta på norsk av energikrise.no

Vi distribuerar filmen til kostpris, Kr 60,- inkl. porto.

Kjøp filmen, kopier og sprei han til alle du trur vil ha interesse av han.

For i Bartlett si ånd:

"We cannot let others do our thinking for us."